Në filozofinë e tij të biznesit, PLUS udhëhiqet nga një ekuilibër i drejtë mes konkurrencës ekonomike dhe zhvillimit social. Përgjegjësitë Sociale janë të integruara në strategjitë dhe politikat e kompanisë, duke synuar krijim të vlerave për kompaninë, punonjësit si dhe shoqërinë në përgjithësi. Teknologjia e përzgjedhur për ngritjen dhe funksionimin e rrjetit përmbush maksimalisht standardet dhe direktivat e Komunitetit Europian. Gjithashtu, që në fillimet e punës së saj, kompania PLUS ka treguar angazhim të plotë në mbrojtjen e mjedisit, duke menaxhuar me kujdes dhe efektivitet mbetjet e ngurta si dhe duke përdorur në proceset e punës, në zyra dhe më gjerë, produkte dhe paketime të ricikluara. Ne synojmë që kjo politikë të pasurohet më tej me elementë të tjerë miqësorë për mjedisin, në proceset e ditëpërditshme të punës së kompanisë.

PLUS ka treguar në mënyrë të vazhdueshme kujdes të veçantë për mbështetjen dhe përkrahjen e nismave në dobi të shoqërisë, veçanërisht duke kontribuar për atë pjesë të popullsisë që është e pamundur të zhvillojë jetesën në kushte normale dhe ka nevojë për ndihmë e përkujdesje të veçantë. Për ne është e rëndësishme të tregojmë se jemi pranë shqiptarëve, jo vetëm nëpërmjet produkteve e shërbimeve që ofrojmë për ta, por edhe nëpërmjet pjesëmarrjes aktive në zgjidhjen e disa prej problemeve, në përputhje me vlerat e kompanisë si dhe filozofinë drejtuese të PLUS.

Nismat në të cilat ne jemi përfshirë janë të shumta dhe ne do të angazhohemi gjithmonë në aktivitete apo veprimtari të cilat do të krijojnë vlera për shoqërinë dhe për qytetarët. Ne do të gjendemi gjithmonë aty ku do të ketë nevojë.

• Mbështetje për Spitalin Universitar “Shefqet Ndroqi”
  Ambientet e gjelbërta janë të rëndësishme, sidomos përreth një qendre spitalore. Ngjyrat që ato sjellin, e bëjnë më pak të lodhshme ditën për personat të cilët vijnë të trajtohen në spital por gjithashtu edhe për familjarët e tyre si dhe personelin e spitalit. Për këtë arsye, PLUS dha kontributin e vet për gjelbërimin e ambienteve të jashtme të Spitalit Universitar “Shefqet Ndroqi”. Ky ishte një projekt që u ndërmorr prej kompanisë në Shtator të vitit 2013. Por PLUS vazhdoi të kontribuonte për tre vite rresht, për zgjidhjen e problemeve të ndryshme në këtë spital. Së fundmi PLUS kontribuoi në rregullimin e shtretërve të reanimacionit të këtij spitali.


• Sponsorizim për gjelberim në lagjen “Komuna e Parisit”
  Në Nëntor të vitit 2013, Kompania PLUS ndihmoi në gjelbërimin e Rrugës Komuna e Parisit, një prej zonave më të populluara të qytetit të Tiranës. Për një zonë që ka një dendësi aq të lartë popullsie sa Rruga Komuna e Parisit, kontributet në shtimin e hapësirave të gjelbërta janë me rëndësi thelbësore në përmirësimin e jetës së të gjithë banorëve. Kjo është një prej nismave që kompania jonë ndërmori në kuadër të përmirësimit të jetës në komunitet.


• Mbështetje në organizimin e aktiviteteve kulturore e artistike për festat e Nëntorit
  Në nëntor të vitit 2013, kompania PLUS, e vetmja kompani me kapital 100 % shqiptar, në bashkëpunim me qeverinë e Shqipërisë, mori pjesë në festimet e organizuara në kuadër të festave të pavarësisë. PLUS ishte e pranishme me një shfaqje cirku, të zhvilluar në qendër të qytetit të Tiranës, me promocione, dhurata e surpriza të shumta për të gjithë të pranishmit, për të festuar mes haresë dhe atmosferës festive, ditët më të rëndësishme në historinë e kombit tonë.


• Sponsorizimi i Laboratorit të urgjencës se Qendrës Kombëtare të Traumës
  Kompania PLUS financoi ngritjen dhe funksionimin e Laboratorit të Urgjencës pranë Qendrës Kombëtare të Traumës. Përmes këtij laboratori mundësohet tashmë diagnostikimi i menjëhershëm i pacientëve që paraqiten në urgjencë pranë këtij spitali, gjë që më parë nuk ishte e mundur. Qendra Kombëtare e Traumës përballon një fluks të konsiderueshëm pacientësh që shkon nga 90 deri në 140 pacientë në ditë. Kapaciteti vjetor i këtij spitali shkon deri në 45 mijë trauma të trajtuara në vit.


• PLUS në ndihmë të jetëve të reja
  Plus Communication ka organizuar dy fushata sensibilizimi me qëllim mbledhjen e të ardhurave për të shpëtuar jetën e dy vogëlusheve që vuanin nga sëmundje të rënda. Kurimi i këtyre sëmundjeve, në të dyja rastet kërkonte trajtime specifike e të vështira, në qendra spitalore të kushtueshme, që ndodheshin jashtë Shqipërisë.
  
  Në të dyja rastet kompania PLUS ju përgjigj kërkesës për ndihmë të familjeve të këtyre vogëlusheve, Mejsi Xhaxhaj dhe Sofia Hamzallari. Kompania i ndau këto raste gjithashtu edhe në faqet në rrjetet sociale, duke u bërë thirrje ndjekësve të faqes për ndihmë.
  
  Me anë të këtyre fushatave, të cilat rezultuan të suksesshme, së bashku me ndihmën e klientëve tanë, ne arritëm të mbledhim shuma të konsiderueshme, të cilat u erdhën në ndihmë familjeve të vogëlusheve.


• PLUS dhuron gjak në përgjigje të kërkesës së Kryqit të Kuq Shqiptar
  Punonjësit e Plus Communication kanë marrë pjesë për disa vjet me radhë në fushatat e dhurimit vullnetar të gjakut, në mbështetje të nevojave të shumta dhe intensive të fëmijëve talasemikë në vendin tonë. Në përgjigje të thirrjes së Kryqit të Kuq Shqiptar, punonjësit e PLUS kanë marrë pjesë vullnetarisht në seancat e organizuara në disa ditë të plota në ambiente të ndryshme të zyrave të kompanisë në Tiranë. Ata kanë treguar solidaritetin e tyre duke mbështetur nevojën dhe domosdoshmërinë jetike të këtyre fëmijëve në vështirësi.


• Pastrim i Plazhit në Zonën e Gjirit të Lalzit
  Punonjësit e Plus Communication, në një nismë të përbashkët me Zonjën e parë të vendit Znj. Odeta Nishani, ndërmorrën një veprimtari për pastrimin e plazhit në zonën e quajtur Gjiri i Lalzit, që gjendet pak kilometra nga qytetet e Tiranës dhe Durrësit. Me pjesëmarrjen në këtë aktivitet PLUS dëshiron të përcjellë një mesazh të rëndësishëm e shembull për t’u ndjekur. Është e rëndësishme që të gjithë ne të ndërgjegjësohemi për mbajtjen dhe ruajtjen e pastërtisë së ambientit që na rrethon, për të siguruar higjenë, shëndet dhe mirëqenie.